Axentes da Policía Local de Vigo identificaron e denunciaron a un veciño da cidade, J.M.S.C., de 54 anos de idade, como presunto autor dun delito de malos tratos animais, por abandonar a un can pequeno, de raza Chihuahua e moi malferido, nun colector de lixo.

Os feitos ocorreron a finais do mes de xaneiro, cando o 092 recibiu unha chamada por parte dun mozo, que atopara o animal nun colector. Segundo o seu relato, atopábase na Avenida da Florida rebuscando no colector porque sufrira o roubo da súa riñonera e quería comprobar se o ladrón se desfixera dela tirándoa.

Ao abrir a tapa, observou que unha bolsa do interior se movía e, ao retirala, comprobou que dentro dela había outra bolsa que, ao abrir, deixou á vista un pequeno can malferido. O animal tiña varias lesións polo corpo e, ante a urxencia do seu estado, o mozo levouno a unha clínica veterinaria do barrio de Navia, seguindo as indicacións da Policía Local.

Unha vez na clínica, o seu responsable recoñeceu ao can, ao que asistira unhas horas antes. Así o trasladou a veterinaria aos axentes que acudiron ao lugar, e a quen explicou que o can estaba moi grave e necesitaba unha intervención cirúrxica. O mozo que o atopou no colector ofreceuse a facerse cargo do can e a pagar os gastos da atención sanitaria.

As investigacións posteriores permitiron identificar o propietario do animal, que ao verse descuberto admitiu que o can fora atacado por outro can da súa propiedade, de raza Akita Americano, e que acabara con graves lesións.

Segundo o seu relato, inicialmente levouno á clínica veterinaria pero, ao indicarlle que necesitaba unha cirurxía que custaba uns 700 euros, decidiu levarlo, alegando que o trataría un amigo seu, tamén veterinario. Unha vez fóra da clínica, recoñeceu que xestionara “moi mal a súa reacción” e que optara por meter ao can nunhas bolsas e tiralo ao colector, crendo que estaba morto.

O animal, de nome Toco, foi finalmente salvado polo mozo que o atopou, un mozo de 24 anos de idade que ten a súa custodia temporal mentres a autoridade xudicial decida cal é o seu destino. A Policía Local confirmou que Toco “a data de hoxe está felizmente recuperado das súas feridas”.