A Cámara de Comercio de Pontevedra, Vigo e Vilagarcía de Arousa abriu xa o prazo para participar na convocatoria de axudas a pequenas e medianas empresas do sector do comercial minorista.
Así, a institución que preside José García Costas levará a cabo 68 diagnósticos gratuítos de innovación comercial a establecementos dcun único obxectivo: axudarlles a mellorar e aumentar as súas vendas.
Estes estudos, que se enmarcan dentro do Plan de Comercio Minorista, financiado polo Fondo Europeo de Desenvolvemento Rexional (FEDER) da Unión Europea e pola Secretaría de Estado de Comercio, non teñen custo algún para as empresas.
Os establecementos interesados en recibir estes diagnósticos e recomendacións, e que cumpran os requisitos establecidos na convocatoria, poderán realizar a solicitude do 2 de outubro ao 23 de novembro.
A avaliación de solicitudes de participación e admisión aos Diagnósticos de Innovación Comercial do Plan de Comercio Minorista realizarase na orde no que sexan rexistradas en calquera das tres sedes da Cámara.
A realización de diagnósticos de innovación comercial forma parte do Plan Integral de Apoio ao Comercio Minorista posto en marcha polo Ministerio de Industria, Comercio e Turismo, e a Cámara de Comercio de España, con participación das Comunidades Autónomas e as organizacións sectoriais.
O plan ten por obxecto dotar ao sector dun conxunto de medidas de apoio para favorecer un crecemento competitivo e equilibrado. Como complemento aos diagnósticos, a Cámara levará a cabo cinco talleres temáticos gratuítos co obxectivo de mellorar e incentivar as capacidades das pymes comerciais en torno a diferentes áreas ou materias estratéxicas.
O primeiro deles terá lugar os días 8 e 9 de outubro nas instalacións de Pontevedra. “Redes sociais para a venda de produtos ou servizos”, é o título deste taller de 4 horas no que os asistentes coñecerán as redes sociais máis importantes asociadas ao sector comercial, e as súas técnicas de venda (Facebook, Instagram e Whatsapp).
Tamén aprenderán a utilizar as ferramentas para a creación de imaxes e contidos dixitais, e finalmente coñecerán os detalles dun Social Media Plan, entre outros temas. Este seminario repetirase os días 10 e 11 de outubro nas oficinas de Vilagarcía de Arousa.
Finalmente, os días 15 e 16 de outubro na sede de Vigo celebrarase o taller “Aumenta as túas vendas co marketing dixital”. Durante dous días, os asistentes recibirán formación sobre estratexia dixital e analóxica, iniciación ao email marketing, así como a publicidade e presenza en internet, o márketing de contidos e o famoso e tan demandado posicionamento SEO/ SEM, entre outros aspectos.
Está previsto que os dous talleres pendentes de celebración teñan lugar durante o mes de novembro. Os interesados en asistir a estas accións formativas xa poden inscribirse a través da web www.camarapvv.e ou de xeito presencial en calquera das sedes que a
Cámara ten en Pontevedra, Vigo e Vilagarcía de Arousa.
