A Consellería de Infraestruturas e Mobilidade, a través de Augas de Galicia, eliminou tres puntos de vertedura de augas residuais na parroquia de Cabral cara ao rego de Pepín, no municipio de Vigo.
Este foco foi identificado, explican nun comunicado, no marco das inspeccións de rastrexo polos técnicos do Programa de Control de Verteduras, dependente de Augas de Galicia. O traballo dos inspectores da Xunta e a colaboración dos técnicos do Concello de Vigo permitiron identificar as propiedades nas que se orixinaban as achegas irregulares ao dominio público hidráulico.
Para acabar con estes focos foi necesaria a instalación dun novo colector de saneamento na avenida da Ponte, que permitiu a conexión das vivendas das que procedían as verteduras á infraestrutura de saneamento municipal.
