O Administrador de Infraestruturas Ferroviarias (Adif) aprobou a licitación do contrato das obras de desguarnecido da vía que discorre entre Guillarei, en Tui, e Redondela e que pertence á liña férrea Monforte de Lemos-Vigo por máis de 7,3 millóns de euros.

Tal e como recolleu Adif nun comunicado, o prazo de execución da actuación, que facilitará o mantemento da superestructura da vía, foi fixado en dez meses. Deste xeito, actuarase sobre as cunetas actuais e construiranse unhas novas para solucionar os problemas causados polas precipitacións na plataforma co obxectivo de mellorar a calidade e a seguridade do servizo ferroviario.

Así, limparanse e perfilarán de novo as cunetas de terra, ademais de depurar as obras de drenaxe trasversal. Tamén se realizarán actuacións de limpeza e reparación de tapas nas cunetas de formigón. En concreto, as actuacións, entre as que se inclúe a retirada dunha parte ou a totalidade do balasto por baixo da travesa, acometeranse entre os puntos quilométricos 141/560 e 166/255. Neste espazo procederase tamén a nivelar e perfilar a vía.

A maiores, adaptaranse instalacións de seguridade e comunicacións durante as obras e reporanse as que resulten afectadas pola actuación. Tamén se realizarán melloras e modificacións da posición do eixo de vía en alzado e planta mediante a optimización do trazado e o galibo, ademais de levar a cabo un axuste na catenaria.