O alcalde de Vigo, Abel Caballero, volveu advertir da situación de seca e asegurou que o encoro de Eiras está por debaixo do 40 % da súa capacidade. Segundo os seus cálculos, quedan reservas de auga “con garantía de calidade” para uns 38 días. En declaracións remitidas aos medios, o rexedor sinalou que, se continúa a falta de choivas, o encoro alcanzará o 2 de novembro “a cota mínima da súa historia”. Eiras abastece Vigo e outros concellos da contorna.
RESERVAS ADICIONAIS, PERO CON POSIBLES PROBLEMAS DE CALIDADE
Caballero explicou que, unha vez transcorridos eses 38 días, aínda quedarían reservas para outros 57 días, aínda que poderían producirse incidencias porque a auga deixaría de ter unha calidade óptima. O alcalde destacou tamén que Vigo leva 42 días subministrando auga a Baiona. “Se non fose por Vigo, Baiona neste momento tería auga cero, nin unha pinga de auga nas tubaxes”, afirmou.
RECLAMA DE NOVO UN ENCORO ADICIONAL
O rexedor sostivo que a situación sería distinta se se construíse o novo encoro que asegura ter solicitado hai 15 anos. Segundo afirmou, o Goberno de Mariano Rajoy non atendeu a petición, mentres que o de Pedro Sánchez se mostrou favorable. Caballero atribuíu á negativa da Xunta a falta de avances e asegurou que a necesidade desta infraestrutura é “un clamor” en Vigo. Ao seu xuízo, de terse impulsado cando a reclamou, xa estaría rematada.
A POTABILIZADORA E AS CRÍTICAS Á XUNTA
O alcalde defendeu tamén o papel da nova potabilizadora, cun investimento de 25 millóns de euros por parte da concesionaria Aqualia, para manter a calidade da subministración. “Se non, neste momento, a auga de Vigo xa non sería de óptima calidade”, asegurou. Caballero responsabilizou a Xunta da falta de decisións ante a seca. “Estamos nunha situación de alerta moi importante”, advertiu, antes de acusar o Goberno galego de levar anos sen actuar para evitar a gravidade da situación actual.
