O comité de empresa do Concello de Redondela denunciou a “falta de persoal” e a deterioración que sofren, ao seu xuízo, os equipos de traballo que “caen a cachos”.

Nun comunicado, empregados lembran que levan anos lamentando esta situación e, a pesar de que “todos e cada un dos postos de traballo do Concello teñen unha partida económica reservada para pagar o salario de todo o ano”, o goberno local “empéñase en manter ano tras anos unha media de 20 postos vacantes”. Isto, segundo engaden, prexudica a atención e a solución dos problemas dos veciños.

Ademais, indican que algúns vehículos e equipos de traballo “caen a cachos”, ao ser “moi antigos”, asegurando que algúns automóbiles protagonizaron algún incidente polo seu “mal estado”.

“Pero o goberno non o toma en serio e non fai practicamente nada por reverter esta situación. O feito de non ter uns equipos de traballo en condicións retarda o traballo, supón un esforzo extra e pon en perigo a seguridade dos traballadores”, critican.

“Estamos nun punto onde o goberno local tenta negarnos as mudas anuais de roupa de traballo, algo que non lembran nin os máis veteranos”, inciden desde o comité, deslizando que a intención do goberno parece ser a de deixar esmorecer estes servizos públicos para “privatizalos”.