A alcaldesa do Porriño, Eva García de la Torre, confirmou este martes o que xa anunciara hai días para evitar unha moción de censura que dea o goberno local ao PP, a súa dimisión como rexedora desta localidade. Nunha rolda de prensa, na que estivo acompañada polos concelleiros do seu grupo municipal, García da Torre anunciou, visiblemente emocionada, a presentación da súa renuncia, que se formalizará este mesmo martes no rexistro municipal, e que cualificou como “un servizo” ao seu pobo, onde seguirá sendo concelleiro e portavoz do grupo socialista.

A rexedora confirmou que deixa a Alcaldía para non ser “un obstáculo” á continuidade dun goberno de esquerdas, pero admitiu que se vai “con amargura”. “Fun unha alcaldesa á que machucaron por ser muller, destacouse o meu peso, a miña aparencia e a miña orientación sexual, por parte dunha xauría covarde amparada no anonimato das redes”, lamentou.

Eva García da Torre, que en 2015 converteuse na primeira muller á fronte do Concello do Porriño en democracia, confirmou que, tras a presentación da dimisión, convocarase un pleno para dar conta da renuncia e logo abrirase un prazo de 10 días para celebrar outra sesión, a de investidura do novo rexedor ou rexedora. O grupo socialista proporá á segunda da lista, Lourdes Moure, para asumir o bastón de mando.

CRISE DE GOBERNO

A crise de goberno no Porriño viña larvándose dende hai meses, coas críticas o grupo EU SON sobre a xestión da rexedora. Este grupo non só denunciou as formas de Eva García de la Torre, senón que tamén cuestionou a súa aptitude para gobernar tras ser investigada xudicialmente por supostas irregularidades relacionadas con esa xestión municipal.

Tras manter contactos co PSOE e co BNG (socios do goberno local) encamiñados a desprazar á alcaldesa e que non deron os seus froitos, EU SON anunciou que negociaría co PP a opción da moción de censura, sempre que os ‘populares’ aceptasen certos compromisos: maior transparencia, control da Policía Local, auditoría das finanzas municipais, etc.

O grupo municipal do PP aceptou esas condicións e, tras a asemblea do pasado domingo, todo parecía indicar que habería un cambio de goberno no Porriño. A dimisión de Eva García de la Torre abre agora unha nova etapa, na que parece viable que O Porriño manteña un goberno de esquerdas, aínda que quedaría por concretar quen será a persoa que asuma o mando do goberno local.