A XXII edición do Festival de Cans estreará o 21 de maio no Torreiro deste pobo pontevedrés o documental conmemorativo ‘Cans 303’, sobre os 70 anos do accidente de autobús que ocorreu na aldea do Porriño, no que faleceron 31 persoas.

Este documental colectivo, que busca preservar a memoria de Cans a partir dos testemuños das persoas de maior idade, é coordinado por Juanma Lodo, e nel colaboran alumnos e alumnas da aldea de diferentes xeracións, segundo informou o festival de curtametraxes nun comunicado.

O accidente sobre o que trata o documental sucedeu en febreiro de 1955 e causou a morte de 31 feirantes que se dirixían á feira de Ponteareas tras incendiarse o autobús fronte a unha escola.

Respecto ao lugar do accidente, o equipo documental está a traballar para elaborar un censo dos naquel entón nenos, que estaban na escola e que aínda vivan, cuxas idades roldarán actualmente os 80 anos.

DATAS E BANDA SONORA

Do mesmo xeito, o Festival de Cans, que se celebrará entre o 20 e o 24 de maio, pediu a colaboración dos familiares ou vítimas da traxedia que poidan achegar información ou algún tipo de documento que poida contribuír ao documental.

A banda sonora do documental contará cun antigo cantar cego sobre a traxedia, que será interpretado polo músico Pancho Álvarez.