O alcalde de Vigo, Abel Caballero, insistiu este venres en que a Xunta de Galicia dá axudas a aerolíneas mediante “mecanismos opacos”, para que operen desde Santiago de Compostela e devolveu a Alfonso Rueda as súas acusacións de mentir.
Nunha rolda de prensa, o rexedor saíu ao paso das palabras do presidente da Xunta, Alfonso Rueda, que nas últimas horas volveu a negar que o goberno galego outorgue axudas directas ou indirectas para voos en Lavacolla.
Así, Abel Caballero, quen manifestou descoñecer o informe de intervención que cifra en 20.500 euros os pagos a aerolíneas por parte da administración autonómica, advertiu de que esas subvencións non se outorgan como pagos por servizos prestados, senón que se achegan mediante “mecanismos opacos, que non se declaran nin se mostran”.
“Rueda cre que somos parvos en Vigo, pero non nos engana, somos máis listos que os que máis”, proclamou o alcalde, quen esixiu ao goberno galego que faga públicos os contratos de publicidade e promocións de Turgalicia, así como as axudas ao Concello de Santiago “que logo se usan nos voos”.
Respecto diso, subliñou que compañías como Ryanair non deixan de operar en Vigo para irse a Santiago “sen nada a cambio”, e insistiu: “O presidente da Xunta mente de forma descarada, cre que a xente é parva”.
Con todo, Abel Caballero insistiu en que non se opón a que Lavacolla reciba axudas públicas para impulsar as conexións, pero Vigo debe ter “polo menos o mesmo”, dado que é “a primeira cidade de Galicia en visitantes”.
O alcalde referiuse tamén ás declaracións da súa compañeira no PSdeG, a primeira tenente de alcalde de Santiago, Mercedes Rosón. Segundo lembrou, a edila socialista apuntou que o éxito de Lavacolla vai “máis aló das axudas que poida dar a Xunta”. “Que poida achegar a Xunta, non dixo que non (achégueas)”, incidiu.
MUSEO MARCO
Por outra banda, o alcalde tamén se referiu en rolda de prensa á achega que a Xunta fai ao museo MARCO (de titularidade municipal) e que cifrou en 100.000 euros.
Segundo recalcou, entre o Concello e a Deputación de Pontevedra, achegan ao funcionamento desta infraestrutura cultural case un millón de euros ao ano, mentres que o goberno autonómico pon a décima parte a pesar de que o MARCO “é o museo de arte contemporánea máis importante de Galicia”.
“A Xunta ten que multiplicar por cinco a súa achega”, reclamou, á vez que criticou que o goberno galego si financie con máis recursos o Centro Galego de Arte Contemporánea de Santiago (xestionado pola administración autonómica). “Miúdo escándalo (…), a Xunta escaqueándose, como sempre”, sentenciou.
