A Central Unitaria de Traballadoras (CUT) volveu a pedir este mércores “eleccións sindicais libres” na factoría viguesa do grupo automobilístico Stellantis, polo que espera que o maxistrado así o resolta o vindeiro venres, cando leve a cabo o xuízo despois da denuncia interposta polo sindicato.
En rolda de prensa, o secretario xeral da CUT, Ricardo Castro, asegurou que os empregados da fábrica non puideron votar en “liberdade” o pasado mes de outubro, xa que moitos deles acudiron ás urnas “acompañados”. Así se recolleu no laudo arbitral que lle deu a razón á organización sindical.
Con todo, do mesmo xeito que Castro, o responsable da CUT en Stellantis Vigo, Vitor Mariño Fernández, criticou que a pesar desta resolución, as medidas cautelares aceptadas polo xulgado permitiron que ata que se dite sentenza non se teña en conta o laudo, polo que agora estanse negociando un expediente de regulación de emprego (ERE) e un expediente de regulación temporal de emprego (ERTE) na planta cun comité de empresa “que non está lexitimado”.
Así, denunciou o “paternalismo” e o “proteccionismo” que, ao seu xuízo, existe cara a Stellantis por parte tanto do poder xudicial como das administracións públicas, animando a “pór límites” xa que “non todo vale”.
A pesar de que o vindeiro venres, día 20, levará a cabo o xuízo, o avogado do sindicato, Brais González, recoñeceu que as expectativas de que haxa unha resolución “xusta” son “practicamente nulas”, tendo en conta que, para el, permitíronse unhas medidas cautelares favorables para a compañía.
No entanto, reivindicou que o sindicado prevé elevar esta reclamación ata o Tribunal Superior de Xustiza de Galicia (TSXG) ou ao Tribunal Constitucional se fose necesario para “resolver 40 anos de manipulación en Stellantis”.
Todo isto despois de que o Colexio Arbitral de Pontevedra, órgano de control das eleccións sindicais, declarase nulas o pasado mes de novembro as eleccións sindicais en Stellantis Vigo tras a impugnación presentada pola CUT. Agora o caso chega a xuízo o vindeiro venres despois de que a empresa recorrese o laudo.
