O presidente da Autoridade Portuaria de Vigo, Jesús Vázquez Almuiña, insistiu este luns na importancia de conectar a terminal de Bouzas por ferrocarril, subliñando que no futuro “un porto sen conexión ferroviaria non terá carga ou terá moi pouca”.
Así o sinalou nun almorzo informativo no que fixo balance deste ano que está apunto de terminar e no que tamén aproveitou para falar das previsións do organismo de face a 2023 e a anos próximos.
Segundo indicou Vázquez Almuiña, a maior terminal de Vigo necesita conexión ferroviaria xa que a Unión Europea nun “futuro próximo” obrigará a que parte da loxística sexa transportada en tren e en España só un 5% do total móvese neste medio de transporte.
Para o presidente da entidade, “non hai confrontación”, xa que, segundo as súas palabras, a secretaria de Estado de Transportes dixo que os portos “non poden ser un almacén” e mesmo o actual alcalde de Vigo, Abel Caballero, cando foi presidente do porto asegurou que a obra máis importante para Bouzas era a súa conexión.
Por todo iso, desmentiu todos os inconvenientes que, a priori, tería esta infraestrutura. En primeiro lugar, subliñou que non suporía unha redución de espazo de almacenamento de vehículos en Bouzas, xa que o Porto está a aumentar os metros cadrados dispoñibles para que isto non ocorra.
Ademais, subliñou que “non se pretende romper a cidade”, porque se podería acometer unha obra en túneles ou outras alternativas como chegar a Bouzas por Valladares.
Vázquez Almuiña indicou que sería bo para toda a cidade, xa que despexaría das rúas a centenares de camións de mercadoría e máis nun momento como no actual que, segundo dixo, os atascos repítense diariamente en Vigo. Por iso, pediu buscar a mellor alternativa para que o tren chegue por fin a Bouzas.
Precisamente Abel Caballero cargou contra Almuiña na súa rolda de prensa diaria, indicando que a Autoridade Portuaria segue coa súa “obcecación” e as súas “mentiras e ocultacións” sobre o tren a Bouzas. Para o rexedor, o Porto xa está conectado co tren en Guixar e “non o usan”.
Ademais, volveu a insistir en que Stellantis sairía prexudicada porque tería menos espazo e as vías “cruzarían a cidade” por sitios como Praza América, segundo as súas palabras.
ANO COMPLEXO
Na reunión con xornalistas, Vázquez Almuiña referiuse a os temas que estiveron de actualidade ao longo deste ano, subliñando que foi un exercicio “complexo” debido a varios problemas como o de escaseza de materias primas, microchips, o veto á pesca de fondo de Bruxelas ou os problemas loxísticos.
Todo iso afectou en maior ou menor medida ao Porto, polo que pechará o ano cun volume inferior ao 2021, aínda que lembrou que o pasado foi o segundo mellor dos últimos exercicios.
Aínda así, o presidente do Porto puxo en valor o crecemento do movemento de mercadorías en colectores, a pesar de que recoñeceu que determinados produtos optaron por volver ser transportados de forma tradicional. Con todo, o movemento de vehículos pechará o ano cunha caída próxima ao 8%.
Almuiña destacou as iniciativas centradas no crecemento azul, para reducir as emisións e o impacto ambiental da actividade portuaria. Iniciativas para as que se aprobaron xa 94 millóns de euros, dos cales uns 35 millóns proveñen de fondos europeos.
O directivo fixo un repaso polas principais actividades do porto, esperando que en 2023 creza tanto a recepción de cruceiros, como máis de 100 escalas, así como o traballo nos estaleiros da Ría de Vigo, tras a compra de Barreiras por parte de Armón e a reactivación de Vulcano.
