A Escola de Enxeñaría Industrial da Universidade de Vigo (UVigo) acolleu este xoves a xornada de peche do proxecto europeo ‘Circular Sexas’ con representantes de todos os socios que forman parte dunha iniciativa liderada desde o centro tecnolóxico vasco Leartiker Polymer R&D.
Entre eles, atopábanse portavoces da Universidade Tecnolóxica de Munster (Irlanda), o Instituto Politécnico de Leiria (Portugal), a Universidade da Rochelle (Francia), a Communauté d’agglomération da Rochelle (Francia) e a propia UVigo, que participa no proxecto da man do grupo de Enxeñaría Eficiente e Dixital, dirixido polo profesor Xullo Garrido, que foi o encargado de dar a benvida aos asistentes á reunión.
Segundo informou o Diario Oficial da UVigo (DUVI), a iniciativa, financiada con preto de dous millóns de euros do Fondo Europeo de Desenvolvemento Rexional (FEDER), comezou a comezos de 2020 coa idea de “desenvolver toda unha serie de tecnoloxías que permitisen converter os residuos plásticos oceánicos e do contorno marítimo portuario en compoñentes ecoinnovadores para a propia industria marítima”. Agora, tal e como sinalou o DUVI, o sistema “está listo” e “quedará dispoñible en repositorios abertos a partir do próximo mes de xaneiro”.
Para conseguilo, os socios do proxecto desenvolveron un contorno integrado de impresión 3D na que se lle dá ao usuario final a posibilidade de empregar infinidade de opcións, aditivos e mesturas de maneira que “non é preciso nin ser especialista en materiais nin en impresión 3D para poder crear material reciclado e imprimir novas pezas”.
