O presidente da Autoridade Portuaria de Vigo, Jesús Vázquez Almuiña, fixo un chamamento á colaboración institucional para buscar solucións conxuntas ao problema do botellón na cidade, que se desenvolve en gran parte en zona portuaria.
Así o sinalou durante a reunión de coordinación á que foran convocados representantes da Subdelegación do goberno en Pontevedra, do Concello de Vigo, da Policía Nacional, da Policía Local e da Policía Autonómica e á que, finalmente, só asistiu un representante desta última.
Segundo Vázquez Almuiña, os botellóns supoñen un problema de seguridade cidadá, ademais de graves prexuízos para os veciños das zonas afectadas polos ruídos que xeran e a alteración da orde que supoñen.
“Unha cuestión á que tamén fai referencia a propia Subdelegación do Goberno nun escrito remitido na tarde de onte e no que desculpan a ausencia da subdelegada, Maica Larriba. Ademais de asegurar que os problemas de seguridade cidadá derivados do botellón deben ser abordados na Xunta Provincial de Seguridade”, explicou o Porto nun comunicado.
Por iso, o presidente da Autoridade Portuaria solicitou que se convoque dita Xunta “o máis axiña posible”, onde poidan participar todas as partes implicadas para analizar os feitos e coordinar medidas que dean solución aos problemas de seguridade xurdidos como consecuencia destas concentracións.
Vázquez Almuiña lembrou a existencia de informes do Ministerio de Interior e da Avogacía do Estado que conclúen que, aínda que o acontecido tivese lugar en zona portuaria, a seguridade cidadá non é unha competencia do Porto de Vigo, senón que corresponde ao Concello.
Con todo, o alcalde, Abel Caballero, instou este pasado xoves ao Porto a “buscar solucións e resolver” o problema dos botellóns, asegurando que é a Autoridade Portuaria a que ten que “garantir a situación” e é o propio persoal do Porto o que ten que encargarse.
Precisamente a concelleira de Seguridade, Contratación e Xestión Municipal, Patricia Rodríguez, non acudiu ao encontro ao asegurar que a notificación “non lle chegou nin en tempo nin en forma”. Con todo, asegurou esta mesma mañá que estaba dispoñible a partir das 13,00 horas deste venres para recibir a Vázquez Almuiña, o cal tiña cita horas antes.
