O concelleiro do BNG de Vigo, Xabier P. Igrexas, pediu ao Concello olívico que actúe para frear o “fenómeno especulativo” dos pisos turísticos na cidade, polo que propuxo a posta en marcha dunha ordenanza municipal e medidas urbanísticas para frear o aumento de vivendas destinadas a visitantes, “que superan xa a oferta dispoñible para aluguer e que están a empuxar os prezos á alza”.

“Non podemos permitir que Vigo continúe sendo o segundo municipio en toda Galicia por detrás de Sanxenxo en número de pisos turísticos”, lamentou Pérez Igrexas, quen alertou de que esta situación está a agravar “o problema de acceso social a unha vivenda”.

Ademais, o concelleiro nacionalista asegurou que se trata dun fenómeno “absolutamente desregulado” que está a abrir a porta a “moitos abusos”, polo que urxiu ao goberno local que conteña este incremento, xa que en Vigo hai máis de 700 pisos rexistrados para usos turísticos e prevese que alcancen o mil a final de ano.

Por todo iso, desde o Bloque reiteraron a súa proposta de pór en marcha unha ordenanza municipal que regule esta actividade, limitando a súa proliferación, así como adoptando medidas a nivel urbanístico que garantan que as vivendas da cidade non se destinan a usos especulativos.