Un home, C.E.S. de Vigo e 40 anos de idade, foi detido na tarde deste pasado luns na cidade olívica tras agredir un octoxenario na rúa Vázquez Varela.
Tal como informou a Policía Local, os feitos ocorreron sobre as 19,50 horas e foi o 112 Galicia o que informou os axentes de que un home, S.L.L. de Redondela e 80 anos de idade, estaba a sangrar con abundancia pola cabeza tras sufrir unha agresión.
Unha vez no lugar, os axentes observaron como o home estaba a ser atendido polos técnicos sanitarios por unha ferida na cabeza que necesitaba puntos de sutura. Foi unha testemuña dos feitos o que explicou que viu como na confluencia de Vázquez Varela con Paraguai discutían dous individuos na beirarrúa. Durante o encontro, a vítima fuxiu, tratando de refuxiarse entre uns colectores.
Con todo, foi perseguido polo outro home, e comezou un forcexeo que acabou proxectando o octoxenario contra un farol, o que lle provocou a ferida na cabeza. Tras localizar ao agresor, foi detido pola suposta comisión dun delito de lesións.
