A delegada territorial da Xunta en Vigo, Marta Fernández-Tapias, anunciou que as visitas guiadas á Cidade da Xustiza volverán este mércores, antes de que o vindeiro luns, día 24 de outubro, comece o traslado definitivo dos xulgados desde o edificio da rúa Lalín.
Estas xornadas de portas abertas, as últimas antes da posta en funcionamento da infraestrutura xudicial, levarán a cabo este mércores, xoves e venres con horarios de 10,00 a 13,00 horas e de 16,30 a 18,30 horas. Non será necesario realizar solicitude previa e o acceso será por orde de chegada a través da porta principal en grupos de 15 persoas.
Fernández-Tapias indicou que desde que se puxo en marcha esta iniciativa máis de 4.000 persoas acudiron a coñecer a nova Cidade da Xustiza, situada no antigo edificio do Hospital Xeral.
Unha vez iniciado o pasado setembro o traslado do arquivo, o vindeiro luns comezarán a instalarse os xulgados. Os primeiros en facelo serán os dous Contencioso-Administrativo. A pesar diso, non haberá que suspender ningún dos xuízos programados e en abril todos os órganos xudiciais xa operarán en Pizarro.
