Unha muller tivo que ser liberada do coche e trasladada en ambulancia ao resultar ferida nunha colisión por alcance ocorrida na A-55, ao seu paso por Mos. O resto de implicados non necesitaron ser derivados.
Segundo informa o 112 Galicia, ocorreu este luns pasadas as 14,00 horas, cando varios particulares chamaban para alertar dun choque entre dous vehículos no quilómetro 8,3 da A-55, na parroquia de San Martiño de Tameiga. Ademais, indicaban que un dos coches quedara situado no medio de tres carrís de circulación.
De inmediato, o 112 activou un operativo coa colaboración de Urxencias Sanitarias de Galicia-061, do Porriño, do GES de Mos, da Garda Civil de Tráfico, da Policía Local, de Protección Civil do municipio, dos bombeiros de Vigo e do servizo de mantemento das estradas.
Minutos despois do primeiro aviso, o persoal dos servizos sanitarios apuntaba a que unha das condutoras era incapaz de abandonar o coche polos seus propios medios.
Así, os bombeiros do Porriño e o GES tiveron que usar o equipo de excarceración para desbloquear a porta do vehículo e retirar finalmente á ferida, que foi trasladada en ambulancia sen, en principio, revestir gravidade, tal e como indica o 112.
