InicioEconomíaA Xunta compromete 14 millóns para o instituto de Navia

A Xunta compromete 14 millóns para o instituto de Navia

Román Rodríguez insiste en pedir "colaboración" ao goberno local para que se poida levar a cabo a obra.

PUBLICADO O

A Xunta de Galicia elevou a 14 millóns de euros o investimento consignado para a construción do novo instituto do barrio vigués de Navia, polo que volveu pedir colaboración ao Concello de Vigo para que “desbloquee” a tramitación dos terreos.

Así o sinalou este luns o conselleiro de Cultura, Educación, FP e Universidades, Román Rodríguez, nun acto no que explicou o compromiso orzamentario do Goberno galego con esta infraestrutura, que xa aparecerá reflectida nos orzamentos de 2023 e que en total suporá un investimento de 14 millóns de euros, dous millóns máis que o inicialmente previsto.

Segundo el, trátase dunha obra “esencial, estratéxica e necesaria para a cidade”, polo que os primeiros 220.000 euros se gastarán en 2023 para iniciar a redacción do proxecto, sempre que o Concello de Vigo firme o convenio para a cesión dos terreos, que lle foi remitido hai meses.

Tal como insistiu Rodríguez, os terreos pertencen á Consellería de Medio Ambiente, Territorio e Vivenda da Xunta pero, debido á normativa vixente, teñen que ser transferidos ao Concello para que este volva transferilos á Consellería de Educación, a encargada de construír o instituto. Por iso, a Xunta pediu ao Concello que asine un convenio para aforrar trámites administrativos, o cal aínda non foi rubricado, situación que continúa atrasando a obra, segundo denunciou o Executivo autonómico en reiteradas ocasións.

Román Rodríguez puxo en valor que a Xunta xa ten consignados para a obra propiamente dita case 7 millóns para o orzamento de 2024 e outros 7 millóns para 2025. “De feito, en canto o Concello firme ese convenio, a redacción do proxecto podería saír a licitación de forma inmediata”, recalcou o conselleiro, que fixo un chamamento ao diálogo por parte da administración local.

“A día de hoxe, a Xunta xa completou todos os pasos ao seu alcance para facer realidade este instituto. Esperamos que o goberno local estea á altura dun proxecto destas características e poña todo do seu parte para facelo realidade”, reivindicou.

O novo instituto de Navia ocupará unha superficie total de case 8.200 metros cadrados construídos sobre unha parcela de 12.576 metros para albergar a uns 700 alumnos. Entre as súas características, contará con 20 aulas (16 para Educación Secundaria Obrigatoria e 4 para Bacharelato), ademais de aulas especializadas, laboratorios, biblioteca, ximnasio ou vestiarios.

ÚLTIMAS

Vigo supera de novo os 300.000 habitantes, “de longo a maior cidade de Galicia”

O alcalde de Vigo, Abel Caballero, anunciou que a cidade volveu a superar os 300.000 habitantes...

Case nove de cada dez usuarios da Asociación Érguete en Vigo comezou a consumir drogas antes dos 18 anos

Preto do 88% dos usuarios da Asociación Érguete en Vigo comezou a consumir drogas antes...

Abel Caballero celebra a chegada da moi alta tensión eléctrica á cidade: “É o que Stellantis e a cidade quería”

O alcalde de Vigo, Abel Caballero, celebrou este mércores o anuncio da aprobación no Consello...

Interceptan un dron non autorizado durante a carreira Vig-Bay en Baiona

A Garda Civil durante o Medio Maratón Gran Baía Vig-Bay, que se celebrou o domingo, interceptou no...