A delegada territorial da Xunta en Vigo, Marta Fernández-Tapias, visitou este xoves as instalacións da futura Cidade da Xustiza da cidade, onde xa finalizou a instalación dos equipos informáticos ante a “inminente” posta en marcha da nova infraestrutura, situada na torre do antigo Hospital Xeral.

“Xa temos todo listo e equipado para iniciar o traslado dos xulgados do Contencioso-Administrativo, que serán os primeiros porque comparten sala de vistas”, subliñou Fernández-Tapias, que estivo acompañada de xuíces e letrados na súa visita.

A delegada do Goberno galego tamén visitou o edificio anexo da Cidade da Xustiza, onde estarán situados o decanato e os colexios profesionais. Alí, informou de que nos próximos días desenvolveranse as últimas reunións de coordinación para a apertura das instalacións.

Unha vez iniciado o mes pasado o traslado do arquivo, o ritmo de traslado á nova sede levará a cabo con dous órganos xudiciais cada semana, segundo explicou a Xunta nun comunicado. Os criterios de orde irán en función das unidades con menos público e que comparten sala de vista.

Así, en primeiro lugar entrarían na Cidade da Xustiza os dous Contencioso-Administrativo, xunto coa Primeira Instancia 4 e reforzo de Primeira Instancia. A continuación, Social 6 e Instancia 5, ademais de Mercantil e Penal 1. Esta distribución busca minimizar a afección á actividade xudicial programada, polo que non se suspenderá ningún xuízo xa programado.