O Tribunal Superior de Xustiza de Galicia (TSXG) ditou sentenza, con data de 23 de setembro de 2022, na que confirma a legalidade da prórroga da concesión do servizo de bus urbano (que ostenta a empresa Vitrasa), acordada polo Pleno do Concello de Vigo en xuño de 2020.
Na súa resolución, o alto tribunal galego estima parcialmente o recurso que interpuxo a Federación Veciñal de Vigo contra unha sentenza previa, de primeira instancia, na que un xulgado vigués declarou que a prórroga era conforme a dereito e que a entidade veciñal non tiña “lexitimidade activa” para impugnar esa prórroga.
Agora, o TSXG estimou que a Federación si está lexitimada para recorrer a decisión porque, entre outras cuestións, interveu no proceso de aprobación dos pregos e forma parte do Consello Municipal de Transportes.
No entanto, con respecto ao fondo do asunto, o Tribunal Superior de Xustiza de Galicia comparte os argumentos da xuíza de primeira instancia e determina que “o intento frustrado de aprobar un novo expediente de contratación que finalizase cunha nova adxudicación do contrato levaba necesariamente a prorrogar o contrato orixinal, como así se fixo de forma motivada e dentro do prazo máximo previsto”.
“SUCURSAL DUN PARTIDO POLÍTICO”
O alcalde, Abel Caballero, acolleu con satisfacción esta sentenza do TSXG, e valorou que o alto tribunal “considera adecuada e motivada” a prórroga.
Con respecto á entidade recorrente, o rexedor proclamou que “todos saben que a FAVEC é a sucursal dun partido político”, e tamén afeou aos partidos da oposición (PP, Marea e BNG, que se opuxesen a esa prórroga. Ao seu xuízo, tanto a Federación Veciñal como esas formacións políticas quedaron “desautorizadas” polo TSXG.
“A actuación do Concello foi impecable, de acordo con lei”, proclamou, antes de preguntar “quen vai dimitir agora”. “Nós dedicámonos a gobernar, e eles fan o ridículo”, resolveu.
