Un ciclista resultou ferido a última hora deste xoves en Nigrán tras caer da bicicleta ao ser atacado por un papagaio que, segundo contou aos servizos de emerxencias, xa o agrediu noutras ocasións.

Segundo informou o 112-Galicia, o suceso ocorreu sobre as 19,30 horas deste xoves no quilómetro 12 da PO-325, ao seu paso por Panxón. Un particular chamou a emerxencias para pedir asistencia sanitaria para o ciclista, ao que atopou tendido na estrada e non respondía.

Ata a zona desprazouse unha ambulancia do 061, que asistiu o ferido. A vítima asegurou que se caeu da bicicleta porque fora atacado por un papagaio e que este “xa actuara noutras ocasións” con anterioridade. Tamén se achegou ao lugar unha patrulla da Garda Civil de Tráfico.