Un grupo de sindicalistas históricos da cidade de Vigo, antigos traballadores de empresas como Citroën (agora Stellantis), O Corte Inglés, Grupo de Empresas Álvarez ou Vulcano (agora Astilleros San Enrique), fixo pública este luns en rolda de prensa a súa petición para o Concello de Vigo dedique un “espazo público” na cidade a lembrar a folga xeral do 72 e aos homes e mulleres que, a pesar da dura represión, loitaron nese contexto por melloras laborais, pola liberdade e a democracia.
Así o trasladaron nunha comparecencia na que lembraron a transcendencia desas semanas de mobilización en setembro de 1972, con protestas duramente respondidas polas forzas policiais e pola administración, e que acabaron co despedimento de medio centenar de traballadores e con represalias a líderes sindicais, algúns dos cales tiveron que “pasar á clandestinidade”.
As protestas deses días, que supuñan a continuación ás mobilizacións iniciadas en Ferrol en marzo dese ano, deben ser lembradas e recoñecidas, a xuízo destes sindicalistas, especialmente este ano, cando se cumpre o 50 aniversario desa “loita”, que paralizou a planta de Citroën, estaleiros, e outras empresas.
Así, consideran que “é necesario e de xustiza” lembrar esa folga “que foi exemplo para outras cidades do país”, e advertiron de que o compromiso do alcalde, Abel Caballero, co que se reuniron a pasada semana, de aprobar unha declaración institucional, “non é suficiente”. Por iso, piden que a cidade dedique “un espazo público” que “sirva de recoñecemento” ao ocorrido no 72 “e como recordo para as futuras xeracións” da súa contribución “á conquista de liberdades e da democracia”.
