O cantante español Dani Martín reuniu este pasado mércores en Vigo a unhas 90.000 persoas, segundo datos do Concello, polo que se converteu no concerto con máis afluencia de público da historia do auditorio de Castrelos. Así o sinalou este xoves na súa rolda de prensa diaria o alcalde, Abel Caballero, quen reivindicou que Dani Martín “o petou” na cidade cunha actuación “magnífica”.

Caballero aproveitou para facer balance dos concertos en Castrelos, que terminaron con Dani Martín e que este ano congregaron a unhas 615.000 persoas ao longo de todo o verán, con outras citas como a de Sting (80.000) ou Sebastián Yatra e Leiva, con 60.000 persoas en cada ocasión.

Precisamente en Castrelos, esa mesma noite derrubouse unha árbore contra un muro do parque, provocando danos no enreixado pero sen causar feridos. Caballero indicou que o exemplar tiña problemas nas súas raíces e estaba a ser monitorado polo Concello. Con todo, acabou caendo de forma fortuíta.