A Policía Nacional de Vigo-Redondela recibiu nas últimas semanas varias denuncias por estafa na que a vítima recibe unha mensaxe dun número descoñecido facéndose pasar por un familiar próximo (fillo, nai…) e solicitando de maneira urxente unha cantidade de diñeiro, co fin de facer fronte a un problema inesperado.

Tal como explicaron os axentes nun comunicado, por lograr o engano, alegan que non poden comunicarse directamente co seu teléfono habitual debido a supostos problemas co terminal, que lles impide facer chamadas.

As vítimas, aínda que en ocasións teñen dúbidas, non comproban a veracidade da mensaxe, nin a identidade dos seus familiares, e acceden a realizar transferencias, tal e como lles solicitan. Unha vez que se realiza a transacción e os prexudicados conseguen falar cos seus familiares, comproban que foron vítimas dun engano e que non poden cancelar a transferencia.

As cantidades defraudadas efectúanse en distintos pagos, observando que o número de teléfono desde o que se solicita o diñeiro coincide, do mesmo xeito que o destinatario da transferencia.

“En caso de recibir unha comunicación deste tipo, a Policía Nacional recomenda non perder a calma e asegurarse antes de facer ningún pago de que a persoa que está a contactar é realmente un familiar”, subliñaron os axentes.