O histórico grupo ‘folk’ Luar na Lubre súmase ao cartel das festas de verán de Vigo, cun concerto que terá lugar na parte exterior do auditorio de Castrelos, o 25 de xullo ás 22,00 horas.
Así o confirmou en rolda de prensa o alcalde, Abel Caballero, que tamén informou de que a actuación prevista, ese mesmo día, do grupo bretón Gwendal quedou suspendida. “É imposible que veña, non depende de nós, hai razóns que lles impiden estar aquí”, constatou o rexedor.
Con todo, subliñou que Luar na Lubre “son infinitamente mellores”, “un dos grupos históricos máis importantes de música tradicional galega e música folk que houbo nunca”. Así, os galegos presentarán en Vigo, nun concerto gratuíto, o seu último traballo ‘Vieiras e Vieiros. Historias de Peregrinos’, e repasarán tamén os temas máis coñecidos da súa dilatada traxectoria.
