A secretaria xeral do PPdeG, Paula Prado, afirmou este domingo que a presidenta da Deputación de Pontevedra, Carmela Silva, faltou ao respecto á delegada da Xunta en Vigo, Marta Fernández-Tapias, o pasado mércores 29 de xuño na recepción a autoridades de Galicia organizada polo Corpo Consular acreditado en España e destinado en Vigo.

Segundo o PPdeG, durante este acto, celebrado no hotel Attica 21 de Samil, Carmela Silva dirixiuse a Marta Fernández-Tapias con expresións como “non es máis que unha simple directora xeral”, “es un carguiño menor” ou “que che cres, presidenta?, no momento de colocarse as autoridades para a fotografía de familia.

Nun vídeo difundido polos populares galegos, obsérvase como, no instante de colocarse para esta imaxe, ambas as mandatarias intercambian unhas palabras e Fernández-Tapias, que nun principio estaba situada detrás de Carmela Silva, sitúase á esquerda da presidenta da Deputación provincial.

Para Paula Prado, a actitude que segundo os populares tivo Carmela Silva é “unha falta de respecto no ámbito institucional”, xa que Marta Fernández-Tapias é a delegada da Xunta en Vigo “e por tanto representa o Goberno de todos os galegos” e, por outra banda, “un desprezo e unha falta de respecto a todas as mulleres”.

Ademais, a secretaria xeral dos populares galegos, defendeu que se se quere que as mulleres asuman postos de responsabilidade e de dirección, “non é de recibo que a presidenta da Deputación desprece á representante da Xunta de Galicia” e, engadiu, “iso leva a un desprezo no ámbito da igualdade”.

Nesta mesma liña, Prado criticou que Silva defende “un feminismo de lata e de todo a cen” que “non representa as mulleres de Vigo, áas de Pontevedra e tampouco ningunha muller de Galicia”.