O Ministerio de Transportes, Mobilidade e Axenda Urbana aprobou o documento de información pública do proxecto de instalación de pantallas acústicas na autoestrada AP-9, no tramo situado entre as ligazóns da comarca do Morrazo e o barrio vigués de Teis.

Tal como informou o Goberno nun comunicado, tras esta aprobación continúase coa redacción do proxecto de construción, onde se define dita actuación co grao de detalle necesario para facer factible a súa construción e explotación.

“O obxecto da actuación, cun orzamento base de licitación estimado de 7 millóns de euros, é a mellora da calidade acústica en áreas moi poboadas da contorna deste tramo de autoestrada, afectadas as obras de ampliación a terceiro carril, en particular sobre a poboación de Chapela”, engadiu o Executivo.

Por iso, realizouse un estudo acústico no que se analizan as fontes de ruído e as edificacións afectadas, propondo medidas correctoras. Estas consisten na instalación de 26 pantallas acústicas de ata seis metros, repartidas ao longo do ámbito de actuación. En total, está prevista a colocación de case 3 quilómetros lineais, que serán de metacrilato.