O delegado do Goberno en Galicia, José Miñones, participou este mércores xunto coa subdelegada do Goberno en Pontevedra, Maica Larriba, na recepción do Corpo Consular acreditado en Vigo, onde puxo en valor o seu traballo “en aras do crecemento económico e social”.

Durante a súa intervención no acto, Miñones quixo destacar a tarefa que leva a cabo o Corpo Consular vigués, “discreta, pero importante”, e subliñou que buscan “achegar persoas e achegar veciñanza”. Tamén puxo de relevo o labor de asistencia que prestan aos habitantes de Vigo “se nun momento determinado necesitan auxilio do seu país de orixe”. Ademais, tratan de fortalecer as relacións comerciais.

José Miñones trasladou os representantes do Corpo Consular presentes no acto o agradecemento formal por parte do Goberno de España e engadiu que este Corpo fala da “relevancia da cidade” de Vigo como “gran urbe” no contexto europeo.

“Grazas pola vosa colaboración, polo voso interese e por facer máis fácil a estancia a quen deciden establecerse nesta cidade, a quen chegan de fóra para vivir, para traballar ou en busca de novas oportunidades de negocio. Grazas porque esa dobre sensibilidade como españois e cónsules, favorece a convivencia e o noso crecemento económico e social”, engadiu no evento, levado a cabo no novo hotel Attica21 de Samil.

Miñones trasladou tamén “o apoio, respaldo e sensibilidade” do Executivo co Corpo Consular e cos países aos que representan, estendendo a súa “total colaboración”.