Con motivo da celebración do Día da Terra, este domingo 22 de abril, a entidade financeira Abanca organizou unha nova acción de reforestación e mellora do medio natural, en Miño (A Coruña), onde se plantaron preto de 500 árbores de especies autóctonas, entre bidueiros, castiñeiros e carballos.
A actividade enmárcase dentro da campaña posta en marcha por Abanca ‘Unha nova árbore’, coa que a entidade repoboou con case 5.000 árbores distintas zonas arrasadas polos incendios do pasado ano en Galicia. As iniciativas desenvolvéronse desde marzo en Coruxo (Vigo), A Mezquita (Ourense), Chandebrito (Nigrán), Santiago, As Neves (Pontevedra) e Miño.
Este domingo 22 de abril, con motivo non só do Día da Terra senón tamén da celebración da Semana Internacional do Voluntariado Corporativo, continuáronse as actividades en Miño, nun espazo verde periférico ao camiño de Santiago.
Empregados da entidade, que tamén forman parte do programa de Voluntariado Obra Social Abanca, acompañados das súas familias e os seus fillos, así como persoas voluntarias que se quixeron sumar, comezaron a repoboación ao redor das 11,00 horas.
A campaña de Abanca ‘Unha nova árbore’ púxose en marcha no pasado nadal “como reacción aos incendios nas zonas máis danadas de Galicia. A entidade comprometeuse á plantación dunha árbore por cada empregado (4.200)
. A esta cifra sumouse a achega solidaria de todos os cidadáns interesados en participar, de modo que a plantación total alcanzará os preto de 6.000 exemplares.
No entanto, Tatiana Suárez insistiu en que “lonxe de ser algo ocasional” hai dous anos que se impulsan desde a Obra Social de Abanca traballos de reforestación, en colaboración co Grupo Naturalista Hábitat, “cun programa con certo sentido instalado no tempo”.
Tras alcanzar os 5.000 exemplares nesta primeira fase, cara a novembro continuarase coa plantación até chegar á cifra de 6.000. Ademais, como próximas actividades, aínda pendentes de definir, desenvolveranse limpezas de especies invasoras, non autóctonas, en distintos lugares que aínda están por concretar, avanzou Tatiana Suárez.
PLANTACIÓN DE BIDUEIROS, CASTIÑEIROS E CARBALLOS
O lugar elixido para a repoboación arbórea este domingo foi unha “zona periférica ao Camiño de Santiago”, que se atopa “bastante degradada, con bastantes especies invasoras”, segundo explicou Santiago Vázquez, vicepresidente de Hábitat.
Por este motivo, elixíronse bidueiros, castiñeiros e carballos, que servirán de “pantalla vexetal con especies autóctonas”.
Cumprirase así unha dobre función. Por unha banda, as novas árbores actuarán de “colchón” para frear posibles incendios e evitar que poidan penetrar na zona urbanizada. E por outro, aumentarán o valor ambiental da zona con especies autóctonas que permitirán fixar “a biodiversidade” e “embelecer” este espazo natural.
