A sección sexta da Audiencia Provincial de Pontevedra, con sede en Vigo, desestimou un recurso de apelación do Banco de Santander, e ratificou a nulidade “por vicio de consentimento” da subscrición de accións do Banco Popular por parte dunha veciña de Vigo, que recuperará uns 14.700 euros.

O Banco Santander, que comprou en 2017 o Banco Popular por un euro, presentou o recurso ante unha sentenza de primeira instancia, que declaraba a nulidade dos contratos de subscrición de accións, efectuados en decembro de 2012 e xuño de 2016, e ordenaba a devolución de case 14.700 euros á prexudicada.

Ademais de pedir que se revogase a sentenza, a entidade financeira solicitaba que se suspendese o procedemento, á espera da resolución do Tribunal de Xustiza da UE (TJUE). Este tribunal fallou hai algo máis dun mes que os accionistas que compraron accións de Banco Popular antes da súa resolución non poden esixir responsabilidade a Banco Santander pola información contida no folleto ou exercer unha acción de nulidade do contrato de subscrición desas accións.

Con todo, a Audiencia de Pontevedra apunta que a sentenza recorrida “non ten como suposto de feito a mera existencia dun dano para a accionista” consecuencia da resolución do Banco Popular, nese caso si se aplicaría a exclusión contemplada nas directivas europeas, senón “nun previo incumprimento desta, como emisora, dos deberes de información legalmente esixibles”.

Ademais, o tribunal provincial sinala que quedou acreditado que, no exercicio 2016, o Banco Popular tiña perdas por case 3.500 millóns de euros e atopábase “en situación de crise económica”, e que a propia entidade recoñeceu ante a CNMV que había un “déficit na dotación de provisións desde antes de 2015”, circunstancias que non se reflectían nos folletos informativos.