Axentes da Policía Nacional da Comisaría de Vigo detiveron un home con antecedentes policiais como presunto autor dun delito de tráfico de drogas.

Os feitos ocorreron o pasado venres, cando unha dotación do 091 observou un coche aparcado na zona do Berbés co seu condutor dentro. Pouco despois, un transeúnte aproximouse a el e, a través do portelo, entregoulle diñeiro a cambio de varios envoltorios de plástico cun po branco.

Os axentes deron o alto ao condutor que, ao verse sorprendido, lanzou polo portelo do coche dúas papelinas, aínda que foron recollidas polos policías.

Ademais, na inspección do vehículo, localizaron 8 envoltorios de cocaína e catro de haxix, ocultos baixo a funda dunha cadeira de bebé. O condutor tamén levaba consigo unha bandoleira cuns 300 euros en billetes fraccionados.

Por estes feitos, o sospeitoso foi detido por un delito de tráfico de drogas, e interviñéronselle en total 5 gramos de cocaína e 6 gramos de haxix.