Este domingo, 600 persoas participaron na décimo terceira marcha ‘700 camisetas contra a leucemia’, organizada pola Asociación Frangil, cun traxecto de 36 quilómetros desde Vigo a Pontevedra.
Esta iniciativa solidaria ten como obxectivo sensibilizar e informar á sociedade sobre a importancia da doazón de medula ósea e de sangue do cordón umbilical.
Antes da saída, ás 9,00 horas desde o Centro Comercial A Laxe (Vigo), realizouse unha homenaxe aos falecidos por esta enfermidade. Tras iso, o promotor da Asociación Frangil, David Gil, animou aos participantes na saída e contou a súa experiencia nas visitas que realiza a centro escolares para animar aos máis novos a doar.
Esta marcha solidaria é unha iniciativa que comezou en 2010. Formaba parte de 10 etapas de percorrer Galicia co propósito de entregar 700 camisetas destinadas ás persoas que formasen parte do rexistro de doantes de medula ósea de Galicia.
Cando arrincou o proxecto en 2009, había unicamente 60.000 rexistros de doazón en España e en 2022 son preto de 450.000. A pesar do salto cuantitativo, desde a Asociación Frangil esta cifra é “insuficiente” para que as persoas que necesitan un transplante de medula teñan posibilidade de atopar un doante compatible. Por iso, esta iniciativa estende o seu labor durante o ano con outras accións de concienciación e visibilidade.
