Preto dun centenar de investigadores presentaron en Vigo avances sobre o control da oxidación lipídica e o uso de antioxidantes, dentro do seu traballo para minimizar os efectos nocivos desta reacción química sobre os alimentos e a saúde.

Tal como se recolle no Diario Oficial da Universidade de Vigo (Duvi), a oxidación lipídica é unha reacción química na natureza cuxas principais consecuencias son a formación de radicais libres, o que degrada os alimentos e inflúe no envellecemento.

“Este proceso ten, por tanto, un importante impacto tanto na saúde alimentaria e humana como na economía, polo que os científicos de todo o mundo traballan para avanzar no control desta reacción”, indica o Duvi.

Moitos destes investigadores reuníronse esta semana en Vigo no 4º Simposio Internacional de Oxidación Lipídica onde o director do comité local organizador, Carlos Bravo, puxo de manifesto que para facer fronte á oxidación se utilizan antioxidantes co obxectivo de controlala. Por iso, as conferencias centráronse nos métodos de avaliación dos devanditos antioxidantes, entre outros temas.