Stellantis presentou dous proxectos ao Proxecto Estratéxico para a Recuperación e Transformación Económica do Vehículo Eléctrico e Conectado (Perte VEC) que mobilizarán 266 millóns de euros, segundo informou a compañía nun comunicado. Un deles estará apoiado polas plantas de Vigo e Madrid, con investimentos duns 43 millóns.
O de maior envergadura, o Proxecto Tese (Transformación cara á Electromobilidade e a Sustentabilidade Industrial de Stellantis), encabezado pola planta de Zaragoza (Figueruelas), suporá 223 millóns de euros de investimento.
Tese, que reúne 23 socios tecnolóxicos e industriais situados en seis comunidades autónomas, 46% delas empresas aragonesas, divídese nun total de 41 proxectos primarios e céntrase no desenvolvemento das tecnoloxías para a fabricación de novos modelos con versións eléctricas na planta a partir de 2023.
Pola súa banda, o proxecto Aries (Automoción Reciclable, Intelixente, Eléctrica e Sustentable), apoiado polas fábricas de Vigo e Madrid, está asociado a investimentos por valor de 43 millóns de euros.
Aries divídese en 26 proxectos primarios que deben executarse antes de finais de 2025, seis deles liderados por Stellantis, como o impulso da nova xeración de vehículos eléctricos que se ensamblan nas factorías, a implantación dun novo taller de baterías en Vigo, a reutilización da auga industrial ou a redución do consumo de enerxía.
Nesta iniciativa participan 25 entidades, 17 delas situadas en Galicia. O 72% das empresas adheridas a este proxecto son pemes, que asumen o 40% do orzamento e optan polo 55% das axudas solicitadas.
Ademais, das entidades participantes no proxecto Aries, nove son organismos de investigación e provedores de tecnoloxía e coñecemento.
