O secretario xeral de Cultura da Xunta de Galicia, Anxo M. Lorenzo, inaugurou este venres no Museo do Mar de Galicia a exposición ‘O Camiño Portugués. Lembranzas de mar e pedra’, unha mostra composta de 120 fotografías dos séculos XIX, XX e XXI que ensina as realidades, as paisaxes e o patrimonio da Ruta Xacobea que une as cidades do Porto e Santiago.
Tal como indicou o Goberno galego, o proxecto propón un diálogo entre a fotografía do pasado e do presente, á vez que brinda a oportunidade de reflexionar sobre o que permanece inmutable e o que se transforma, construíndo unha memoria colectiva do Camiño.
Na exposición poden verse fotografías históricas do barrio do Berbés de Vigo, da rúa Príncipe ou de García Barbón, sacadas no primeiro terzo do século XX pola Casa Loty, Jaime Pacheco ou o fotógrafo alemán Otto Wunderlich, quen retratou a vida, as persoas e as paisaxes de España nos anos 20 do século pasado.
Comisariada por Lucía Laín, a mostra chega a Vigo tras ser visitada por máis de 21.000 persoas na Cidade da Cultura de Galicia, onde pechou as súas portas o pasado mes de abril.