O xulgado do Social 4 de Vigo decidiu suspender a vista sinalada para este venres pola impugnación do ERTE 2022 na planta de Stellantis, promovida polo sindicato CUT, en vista de que tamén foi impugnado o ERTE do ano pasado e aínda non hai sentenza.

O portavoz da CUT na planta de automoción viguesa, Vítor Mariño, explicou que a razón que lles levou a impugnar o ERTE, asinado pola empresa e os sindicatos SIT, CC.OO. e UGT, é que se trata dunha “medida discriminatoria” con algúns colectivos de traballadores.

Respecto diso, explicou que se deixa fóra da regulación os traballadores eventuais e, aínda que esta vez se inclúe aos indefinidos de tempo parcial, “obrígaselles a habilitarlles unha bolsa de horas”. “O que se tenta é evitar o control de horas e o rexistro de xornada, para evitar que sexan declarados traballadores en fraude de lei os que fan unha xornada igual ou comparable aos de tempo completo”, matizou.

“Estamos ante un grupo con millóns e millóns de beneficios, e isto xera máis precariedade e incerteza”, sinalou Mariño, que insistiu en que “tampouco hai criterios claros e definidos para o resto de traballadores”, o que se pon de manifesto coas paradas periódicas por falta de chips. “Hai traballadores que quedan en casa e ven como os seus postos son cubertos por outras persoas”, recalcou, e apuntou que esta situación prexudica máis os empregados máis “vulnerables”, os que teñen limitacións ou medidas de conciliación.