A Asociación Nacional de Fabricantes de Conservas de Peixes e Mariscos (Anfaco-Cecopesca) entregou este venres a súa Medalla de Honra a Juan Vieites, quen anunciou que deixa a secretaría xeral da asociación tras 31 anos á fronte da mesma.
Nun acto ao que asistiron, entre outros, o presidente da Xunta, Alfonso Rueda; o vicepresidente do Goberno galego, Francisco Conde, ou a conselleira do Mar, Rosa Quintana, Anfaco-Cecopesca reivindicou o “incansable” traballo de Vieites durante 42 anos, 31 deles como secretario xeral da asociación, “converténdoa na organización empresarial do complexo mar-industria de referencia a nivel nacional e internacional”.
Vieites aproveitou o evento, que levou a cabo na sede viguesa do Círculo de Empresarios de Galicia, para anunciar que se retira, deixando paso a Roberto Alonso como novo secretario xeral de Anfaco-Cecopesca.
Pola súa banda, a Medalla de Ouro da Asociación foi para o Xacobeo 21-22, como un “éxito” que potencia o binomio cultura-gastronomía e a marca Galicia como primeira rexión produtora de conservas de España.
Ademais, a Medalla de Prata de Anfaco-Cecopesca recaeu en Mercedes Rodríguez, directora xeral de Pesca, Acuicultura e Innovación Tecnolóxica da Xunta, polo seu “compromiso” coa industria e co seu futuro.
Así mesmo, as Medallas de Bronce foron para Diga Salgueiro de Conservas Albo, María Eugenia Urriolabeitia do Grupo Consorcio e María Irene Romero de Jealsa.
