O Xulgado de Primeira Instancia número 8 de Vigo deu a razón a un vigués que foi indebidamente introducido nun ficheiro de morosos, polo que será indemnizado con 10.000 euros pola empresa que o incluíu por suposto falta de pagamento a unha tenda ‘en liña’ de electrodomésticos.

Tal como informou a defensa do demandante, o vigués viuse obrigado a emprender accións legais para defender o seu dereito á honra, por intromisión “ilexítima”, tras a cesión dos seus datos por parte dunha empresa, nos ficheiros de solvencia patrimonial.

Foi en 2019 cando o cidadán descubriu estar dentro dunha lista de morosos, cando lle impediron realizar certas accións bancarias e mesmo financiar a compra dun teléfono móbil, segundo explica Unive Avogados.

A sentenza do xulgado vigués recolle a vulneración por parte da compañía demandada do dereito fundamental á honra do demandante ao ceder os seus datos aos ficheiros de solvencia patrimonial, polo que a condena a pagarlle 10.000 euros.