O alcalde de Vigo, Abel Caballero, saíu ao paso este venres das críticas polo feito de que Concello e Deputación sufragasen a instalación dunha estatua do Sacro Corazón no alto da torre da ermida da Guía, e xustificou a actuación pola necesidade de concluír o proxecto de Gómez Román, “seguramente un do tres mellores arquitectos da historia de Galicia”.

Cuestionado polos medios de comunicación sobre as denuncias de diversos colectivos, entre eles a Asemblea Republicana de Vigo, o rexedor sinalou que non coñece á dita Asemblea e “ninguén a coñece na cidade“. En todo caso, xustificou o uso de fondos públicos para rematar o proxecto da ermida segundo o deseño de Gómez Román, un arquitecto “defensor da República”, destacado membro do Partido Galeguista, concelleiro, membro da Fundación Penzol, da Editorial Galaxia e autor de obras emblemáticas na cidade como A Panificadora, o edificio do Banco Pastor, da conserveira Alfageme, do monumento a Concepción Arenal, do edificio Müller ou da actual sede do Real Club Celta en cálea Príncipe.

Por outra banda, o alcalde matizou que o Concello “non sufragou ningunha imaxe relixiosa”, senón que a estatua foi unha “doazón” da Deputación de Pontevedra, elaborada pola súa Escola de Cantaría, segundo o deseño de Gómez Román, e que a administración pública pagou o transporte e instalación (uns 84.000 euros). “Non quero na cidade ningunha gran obra de arte inconclusa”, insistiu, e acusou á Asemblea Republicana de “atacar” ao arquitecto.

Tras insistir en que está “encantado” e que mesmo o Concello “podía sufragar” a estatua, negou que a imaxe relixiosa teña connotacións políticas vinculadas á ditadura franquista. “Hai que respectar todas as relixións (…) non comparto ese tufillo antirreligioso”, afirmou.

Abel Caballero tamén lembrou que o Concello ten un acordo coa Igrexa para contribuír economicamente no mantemento, restauración e conservación do patrimonio histórico e artístico de bens relixiosos, e colaborou en melloras na igrexa románica de Castrelos ou na restauración do órgano da Concatedral, agora Basílica de Santa María.

Con respecto á ermida da Guía, hai un convenio específico asinado entre o Bispado, o Concello de Vigo e a Deputación de Pontevedra, que recolle a achega, por parte das administracións, dun total de 106.079,65 euros. Así, ademais dos algo máis de 84.000 euros para a instalación da imaxe relixiosa, contémplanse outros 21.845 euros para a iluminación ornamental do exterior da capela.