A Praza Erasmo do campus universitario de Vigo acollerá este xoves ás 12,00 horas un acto de homenaxe a Manuel Ramos Cabrer, vicerreitor de Ordenación Académica e Profesorado da institución académica, que faleceu de forma repentina o 3 de maio no seu domicilio familiar.
Así o confirmou a UVigo, que tamén trasladou o unánime recoñecemento da comunidade universitaria á traxectoria académica e investigadora, ao talante e personalidade deste lucense, enxeñeiro de Telecomunicacións e doutor en Enxeñaría Telemática.
Tanto os seus compañeiros de investigación, como docentes e representantes sindicais mostraron o seu pesar por esta perda, e recalcaron o valor humano de Ramos Cabrer, ademais do seu labor na Universidade de Vigo.
Do mesmo xeito, o equipo de goberno mostrouse conmocionado pola súa morte que, precisamente, se produciu na véspera da xornada electoral, na que Manuel Reigosa revalidou o seu cargo como reitor da institución. De feito, Manuel Ramos formaba parte da candidatura que encabezou Reigosa (e que foi a única que concorreu no proceso).
