A xunta de goberno local do Concello de Vigo adxudicou a construción dun novo parque de bombeiros por 2,7 millóns de euros, segundo anunciou o alcalde, Abel Caballero, na súa rolda de prensa diaria. Así, Vigo contará cunha nova sede de Bombeiros que estará situado nunha parcela do propio Concello da rúa Esturáns, “moi preto” do Porto e tamén do centro, tal como reivindicou o rexedor olívico.
Caballero puxo en valor a necesidade destas novas instalacións, lamentando a situación na que se atopaba o antigo parque de Balaídos. As obras terán un prazo de execución de 12 meses. O novo edificio de bombeiros de Vigo contará con case 2.000 metros cadrados de superficie repartidos entre un soto, un baixo e dúas plantas. Ademais, terá capacidade para saír tres vehículos á vez.
