O alcalde de Vigo, Abel Caballero, pasou en cuestión de días de rexeitar a celebración de concertos do Xacobeo en Balaídos ou no auditorio municipal de Castrelos, a afirmar que, se recibe unha solicitude para o concerto de Muse, está “absolutamente seguro” de que se poderá chegar a un acordo.
Así o trasladou nunha rolda de prensa na que insistiu en que o Concello olívico non recibiu petición ningunha por parte da Xunta, do Xacobeo ou de ningunha promotora para a celebración do concerto da banda británica; todo iso despois de que o goberno galego denunciase que o evento non podería celebrarse pola negativa do alcalde a ceder o estadio municipal.
Nese sentido, o alcalde repetiu que non hai petición sobre ese concerto concreto, á marxe dunha carta do Real Club Celta pedindo permiso para facer concertos e eventos vinculados ao seu centenario.
Con todo, afirmou que se recibe a petición, está “absolutamente seguro” de que se podería chegar a un acordo. “A través dos medios de comunicación non se fan solicitudes en ningún sitio do mundo”, sinalou, e repetiu que segue “esperando” a recibir esa solicitude. “Se se produce, seguro que imos chegar a un acordo”, incidiu.
O alcalde de Vigo manifestou xa en febreiro pasado o seu desacordo coa celebración de eventos do Xacobeo na cidade, alegando que o Ano Santo é “irrelevante” na cidade e pedindo ao goberno galego que transfira o diñeiro para que sexa o propio Concello o que organice os concertos.
A semana pasada, tras coñecerse que a Xunta planeaba un gran concerto en Vigo (aínda que sen desvelar o nome do grupo), Abel Caballero advertiu de que non podería facerse no estadio municipal debido ás obras e, sobre o uso do Auditorio de Castrelos tamén foi tallante: “En Castrelos só organiza concertos o Concello”.
“SEGUIR TENTANDO”
Pola súa banda, a delegada da Xunta en Vigo, Marta Fernández-Tapias, trasladou este luns a súa disposición a “sentar” co alcalde para concretar “o que queira”, e sinalou que a administración autonómica vai seguir ” tentando” que se celebre o concerto de Muse na cidade.
Segundo apuntou en declaracións aos medios, “durante semanas” Abel Caballero estivo a dicir que non cedería o estadio nin o Auditorio de Castrelos, e acusouno de querer “desviar a polémica”. “Nós non mentimos, quedou acreditado que había acordo coa promotora e que a primeira opción para o concerto de Muse era Vigo”, afirmou, e explicou que, ademais de coa promotora, a Xunta “falou co Celta” porque é a entidade que neste momento está a usar o estadio, por iso “foron eles os que pediron o espazo”.
Fernández-Tapias engadiu que as obras de reforma “son unha escusa” porque o estadio conta con plan de autoprotección e poderíase facer este evento, e explicou que a negativa do rexedor “sorprendeu” á promotora.
Con todo, matizou, se hai “posibilidade de cesión”, e o Concello accede a permitir o concerto, a Xunta vai seguir “tentando” que se faga en Vigo. “Pero as horas pasan, e as promotoras teñen que pechar os concertos”, urxiu a delegada, que apuntou que “non hai necesidade dunha nova solicitude” porque “xa está feita”. “Podémonos sentar e concretar o que queira o alcalde. Se quere sentar eu estou disposta”, aseverou.
