O secretario comarcal da CIG de Vigo, Alberto Gonçalves, instou á clase traballadora a que o vindeiro domingo, día 1 de maio, “visibilice na rúa o descontento social” ante a escalada de prezos e a diminución do poder adquisitivo dos cidadáns.

En rolda de prensa, Gonçalves puxo en valor a importancia desta data, Día Internacional dos Traballadores, insistindo na necesidade de asistir ás manifestacións que convoca a organización sindical por toda Galicia.

En concreto, a protesta central levará a cabo en Vigo e sairá do cruce da Dobrada con Urzaiz ás 12,00 horas. A ela acudirá o secretario xeral do sindicato, Paulo Carril. Desde a CIG lamentaron que a situación laboral e social da comarca de Vigo e en xeral de Galicia é “insoportable”, cunha diminución do emprego en comparación con datos previos á pandemia e con datos de 2009, cando comezou a crise económica.

“O peche de empresas e de establecementos é constante”, criticou Gonçalves, indicando que na actualidade esta situación agravouse” debido ao encarecemento do custo da vida pola inflación, que “engole” os salarios e as pensións. Por iso, a organización sindical puxo o foco en cinco grandes eixos de acción que tanto o Goberno central como o autonómico deberían ter en conta, como son frear e reverter os prezos da electricidade, enfrontar o “empobrecemento” dos salarios e das pensións, diminuír a precariedade, reducir o prezo dos combustibles e evitar que o prezo da vivenda siga escalando.

Para cada unha destas demandas a CIG deu unha serie de receitas, como a creación dunha tarifa eléctrica galega, a inclusión en todos os convenios colectivos dunha cláusula de revisión salarial co IPC interanual, a subida do soldo mínimo interprofesional ata os 1.167 euros (o 60% do soldo medio de España) ou a fixación dun prezo máximo dos combustibles mentres non se estabilizan, entre outras.

UNIDADE CON OUTROS SINDICATOS

Preguntado sobre por que este ano tampouco sairán á rúa o día 1 de maio con outros sindicatos, como CC.OO. e UGT que si convocan manifestacións conxuntas, desde a CIG indicaron que a pesar de crer na “unidade de acción“, esa unidade ten que darse “todos os días” e non só “un día ao ano”.

Nese sentido, criticaron que outros sindicatos apoiasen a reforma laboral do Executivo central xa que, ao seu xuízo, non supuxo unha derrogación da anterior reforma do PP, senón que foron “meros cambios cosméticos”.