A CIG convoca unha mobilización este xoves diante do SMAC en Vigo para esixir a
readmisión dunha traballadora da empresa Termocalor de Vigo despedida recentemente ao rematarlle a redución de xornada por embarazo. O Tribunal Supremo confirmara en 2019 a sanción administrativa de 20.000 euros imposta á compañía por acoso laboral contra a empregada durante unha década e que se iniciara nada máis anunciarlle ao seu xefe que se atopaba en estado.
Na sentenza do TS recoñecíase a veracidade do acoso laboral por razón de xénero entre os anos 2008 e 2010, situación que continuou ata que a traballadora foi despedida o pasado 10 de marzo nada máis rematarlle a redución de xornada, unha vez que o seu fillo cumpriu 12 anos. Daquela, asesorada pola CIG, lograra que lle restituísen o horario para traballaba só de mañá, que lle recoñecesen como enfermidade laboral a baixa por ansiedade que tivo que coller e que a indemnizasen con 3000 euros por danos e prexuízos.
O acoso, explica a CIG nun comunicado, iniciouse nada máis comunicar na empresa o primeiro embarazo, pero agravouse dous anos despois cando decide ser nai por segunda vez. Aí, optaron por cambiarlle o horario e obrigarlle a facer as cinco horas de redución a xornada partida (dúas pola mañá e tres pola tarde). “Para min era imposible, porque precisamente collín a redución para traballar só de mañá e poder atender as crianzas pola tarde; non me daba tempo a comer nin a coidalas, polo que acabei cun estrés enorme e con ataques de ansiedade e tiven que coller unha baixa”, relatara entón.
Segundo prosegue a CIG, o propietario de Termocalor, Ramón Argudín, propúxolle que marchara da empresa, pero “non quería pagar a indemnización correspondente e pretendía que ela mesma renunciara ao seu posto”, polo que comezou unha “campaña de acoso laboral contra ela” que foi recoñecida polos tribunais. Agora, unha vez rematada a redución de xornada, a empresa optou, explica o sindicato, por rescindirlle o contrato aludindo “supostas causas disciplinarias”. “En realidade responde a unha represalia e constitúe unha clara vulneración dos seus dereitos fundamentais”, asegura a CIG.
Diante disto, a central sindical xa presentou unha demanda para reclamar a nulidade do despido e convocou unha mobilización que coincide co acto de conciliación no SMAC previo á celebración do xuízo.
