O presidente da Federación Española de Municipios e Provincias (FEMP), Abel Caballero, defendeu este luns a “importancia capital” da Protección Civil na seguridade dos cidadáns e trasladou o apoio da entidade municipalista á campaña ‘Municipio Seguro’.
Así o trasladou Caballero, no pleno Nacional de Protección Civil celebrado no Senado, e recalcou que, a pesar da previsión de elaboración dun plan nacional de Protección Civil co horizonte 2035, “é preciso actuar no curto prazo e no inmediato”.
Precisamente, o Senado albergará un foro permanente sobre o Sistema Nacional de Protección Civil, segundo acordouse no encontro, presidido polo ministro Fernando Grande-Marlaska, e no que tamén se avogou por impulsar a cultura da “autoprotección”. Nese marco, o Ministerio do Interior lanzará a campaña ‘Municipio Seguro’, dirixida a fomentar o establecemento e mellora de accións e mecanismos de Protección Civil neste ámbito territorial.
Abel Caballero sinalou, na súa intervención, que a Protección Civil é “de importancia capital” nos municipios, e que a suma da seguridade nos máis de 8.000 concellos e entidades locais, é a seguridade de toda España. “Para a cidadanía a Protección Civil son os alcaldes e alcaldesas, son os que xa se van a encargar (…) por iso hai que xerar a cultura da protección civil no ámbito próximo”, apostilou Caballero
O pleno acordou tamén impulsar a elaboración dun Plan Nacional de Redución do Risco de Desastres co horizonte 2035, que terá como eixo fundamental o cambio climático e as súas condicións, elaborado no marco do Consello Nacional de Protección.
