O alcalde de Vigo, Abel Caballero, volveu cargar este xoves contra a Xunta de Galicia, asegurando que o Goberno autonómico “lle debe á cidade” 2.258 millóns de euros polo seu volume de poboación. Os orzamentos da administración autonómica para este 2022 acadan a cifra de 11.627 millóns, a máis alta de historia, se ben hai que ter en conta a inflación con respecto a períodos anteriores.
Na súa rolda de prensa diaria, Caballero insistiu en criticar ao Executivo autonómico e ao seu presidente, Alberto Núñez Feijóo, indicando que desde que chegou ao Goberno en 2009 a Xunta “débelle a Vigo” máis de 2.200 millóns.
Segundo as contas do rexedor, o Executivo galego debería gastar os seus investimentos por volume de poboación, polo que do total de máis de 25.000 millóns de euros que o Goberno autonómico investiu nos últimos 13 anos, a Vigo tocaríanlle case 2.780 millóns, a pesar de que só se gastaron algo máis de 500.
Isto sempre segundo datos de Caballero, que considera que o investimento da Xunta débese de facer por volume de poboación. A pesar da dispersión xeográfica da cidadanía galega. Caballero aproveitou a ocasión para insistir nas súas críticas a Núñez Feijóo lembrando, entre outras moitas accións, que Vigo paga a potabilizadora de auga da cidade, aínda que tamén permite que outros concellos como Cangas ou Moaña accedan a ela.
