Vigo acollerá este venres e sábado, 22 e 23 de abril, o III Foro Internacional en Enfermidades Inmunomediadas, que reunirá a máis de cen profesionais das especialidades de Reumatoloxía, Dermatoloxía e Aparello Dixestivo involucrados no manexo de ditas doenzas co fin de compartir innovación, experiencias e mellores prácticas cunha visión de futuro.
Tal como indicou o xefe de Reumatoloxía do Complexo Hospitalario Universitario de Vigo e presidente do Comité Científico de InmuneVigo, Ceferino Barbazán, este foro ofrece un programa onde clínicos, pacientes, xestores e industria farmacéutica poden axuntar esforzos e crecer en aras de proporcionar unha asistencia integral de maior calidade.
Nun comunicado, InmuneVigo explicou que os seus obxectivos son fomentar o traballo colaborativo entre as distintas especialidades implicadas nas enfermidades inmunomediadas, así como coñecer experiencias de éxito a nivel nacional e internacional e cocrear novas iniciativas que melloren a interrelación e efectividade diaria.
Por iso, no encontro compartiranse e debaterán as últimas estratexias terapéuticas, novidades farmacolóxicas e técnicas diagnósticas nas patoloxías inmunomediadas e darase voz aos cidadáns para que trasladen as súas inquietudes sobre as patoloxías que sofren.
