A Policía Nacional da Comisaría de Vigo investiga unha agresión homófoba ocorrida o pasado fin de semana nunha zona de lecer nocturno da cidade, e que acabou con dous mozos feridos e trasladados a un centro hospitalario. Segundo informaron fontes policiais, os feitos ocorreron na madrugada do sábado ao domingo, na zona de Churruca (Praza de Portugal), onde as vítimas, dous mozos, estaban en actitude cariñosa e dándose un bico.

Conforme á súa versión, outros mozos que estaban na praza achegáronse a eles para increpalos e comezaron a agredilos, causándolles lesións de diversa consideración, que obrigaron a evacualos a un centro hospitalario. A Policía abriu unha investigación e está pendente de tomar declaración ás testemuñas, co fin de identificar aos supostos autores desta agresión.