A división de Industria de Comisións Obreiras informou de que quedou desconvocada a folga de traballadores da compañía Elecnor, situada en Mos e que presta servizo para R, despois de chegar a un acordo que garante o mantemento do emprego.

Tras máis de dúas semanas de folga, os traballadores de Elecnor acordaron en asemblea e de forma maioritaria desconvocar a folga indefinida, segundo indicou CC.OO. nun comunicado. Unha folga coa que o conxunto do persoal logrou que a nova adxudicataria do servizo, a valenciana Obremo, se comprometa a subrogar á maioría dos traballadores.

“Grazas á loita do conxunto dos traballadores, lograron que Elecnor recoloque a catro traballadores a maiores dos técnicos de residencial que serán subrogados”, reivindicou a organización sindical. Desde CC.OO. manifestaron a súa desconformidade coa política de externalización e subcontratación de Obremo, “que leva á destrución do emprego polo traslado de determinadas funcións e postos de traballo a outras zonas de España”.