O alcalde de Vigo, Abel Caballero, reuniuse este luns co reitor da Universidade de Vigo, Manuel Reigosa, onde destacou a importancia de que o centro académico “se abra á cidade” e cara á sociedade.
En declaracións difundidas aos medios tras o encontro, Caballero indicou que transmitiu ao reitor as ideas que á súa vez o ministro de Universidades, Joan Subirats, transmitiulle a el na súa reunión hai uns días.
Así, puxo en valor a importancia de que a Universidade teña unha maior participación no ámbito territorial no que está situada, cunha “interrelación total” entre o Concello e o centro académico para que os vigueses e a universidade “camiñen conxuntamente”.
Caballero indicou que volverá reunirse con Reigosa cando este sexa proclamado de novo reitor da UVigo, que será no mes de maio.